- I heq një rrip a një copë, duke e kapur me një majë të mprehtë ose duke e tërhequr fort; e ndaj më dysh a në copa, duke e tërhequr fort nga anët dhe me një lëvizje të menjëhershme një rrobë, një letër etj.; gris; shqyej. Çjerr rrobat. Çjerr këmishën (pantallonat). Çjerr një letër (një fletë). Çjerr me thikë. E çori në gozhdë. I ka çjerrë nëpër ferra.
- Çaj lëkurën e trupit me thonj ose me diçka të mprehtë a me majë, gërvisht lëkurën për së gjati duke e bërë plagë. Çjerr dorën (fytyrën). E çori me thonj. E çori macja.
- fig. Hedh poshtë një marrëveshje, e prish, nuk i përmbahem më diçkaje që është vendosur më parë. Çjerr traktatin.
- fig. Ia heq, ia gris diçka prapa së cilës fshihet. Ia çori maskën.
- fig. I shkaktoj një dhembje therëse, i ngjall një ndjenjë të padurueshme sikur e shpon diçka. Të çjerr zemrën të copëton zemrën, të pikëllon. Të çjerr veshët. Të çjerr barkun. Sikur më çjerr nga brenda.
- euf. Tredh. Çjerr cjapin (dashin, mëzatin). Çjerr kalin.
- krahin. Shpoj një enë. Çjerr ibrikun (kusinë).
- jokal. Ndiej një dhembje therëse sikur më shpon diçka. Më çjerr barku.
- Çjerr zërin bërtas sa ngjirem, thërras sa më ikën zëri. Ia çjerr cipën dikujt ia nxjerr turpin. Ia çori veshët dikujt e mërziti shumë dikë me fjalë që nuk ia ka ënda, i çau kokën. E çjerr ku s'arnohet dëmtoj në një vend që nuk mund të ndreqet më.