Atomik mb. -
- Që i përket atomit, i atomit; që është veti e atomit. Pesha atomike. Masa atomike. Numri atomik. Energjia atomike.
- Që vihet në veprim me energjinë e çliruar nga zbërthimi i atomit ose që shfrytëzon këtë energji; që lidhet me përdorimin dhe me shfrytëzimin e energjisë bërthamore. Central atomik. Reaktor atomik. Nëndetëse atomike. Industria atomike. Armë (bombë) atomike. Shpërthim atomik. Kërpudhë atomike lëmshi i zjarrtë që ngrihet si kërpudhë nga shpërthim i një bombe bërthamore.
- Që ka të bëjë me armët me forcë të madhe shpërthyese, të cilat shfrytëzojnë energjinë bërthamore të atomit; që zotëron ose që përdor këto armë. Bazë atomike. Luftë atomike. Sulm atomik. Rrezik (shantazh) atomik.
- Ombrellë atomike shih tek ombrellë,~a 3.